Karellen
news

Sól og sumarylur

30. 07. 2021

Veðrið er sko heldur betur búið að leika við okkur þessa vikuna enda erum við búin að vera úti að leika alla vikuna.

Á mánudag fóru börnin á yngri deildunum í gönguferð að hoppubelgnum og léku sér þar fyrir hádegismatinn í góðu stuði á meðan börnin á stóru deildunum drógu fram hjólin og hjóluðu um í leikskólagarðinum.

Á miðvikudag mættu börnin á eldri deildunum mjög spennt í leikskólann með sundföt í poka tilbúin til að skella sér í heitapottinn og hundrað ferðir í rennibrautina í Álftaneslauginni, enda var veðrið fullkomið til þess að fara í sund.

Eftir sundið fengu þau sér gönguferð í góða veðrinu á leikvöllinn fyrir aftan leikskólann þar sem þau léku sér fram að hádegismat.

Yngri börnin fengu vatn í box og brúsa til að sulla og pensla til að mála með vatninu sem var heldur betur skemmtilegt.

Á fimmtudag hélt sólin áfram að skína og eldri börnin skelltu sér á rólóinn hjá Bjarnastöðum að leika sér.

Þau fengu með sér ávaxtabita í poka sem þau gæddu sér svo á þegar komið var á áfangastað, enda getur maður nú alveg orðið svangur þegar maður fer í svona gönguferð.

Litlu krílin fengu sparkbílana með sér út á litla svæðið hjá Seylu og gátu keyrt þar um eins og þeim listi og svo var bílamottan sett út á tún ásamt bílabrautinni og litlu leikfangabílunum og þá var nú aldeilis hægt að leika úti í sólinni.

© 2016 - 2024 Karellen