news

Göngum í skólann

17. 09. 2020

Á hverju ári tökum við þátt í verkefninu "Göngum í skólann" sem er á vegum Íþrótta og ólympíusambandi Íslands, en verkefnið hófst þriðjudaginn 15. september. Eldri deildarnar skelltu sér í göngu um nesið okkar fagra í blíðskapar veðri. Börnin á Tröð notuðu tækifærið í göngunni og heilsuðu upp á kindurnar í Gesthúsum og skelltu sér svo á leikvöllinn við Bjarnastaðavör áður en þau héldu aftur í leikskólann.

Börnin á Hliði fóru líka í göngu, en þau kíktu í fjöruna við Lambhaga og svo á leikvöllinn þar áður en þau héldu aftur í leikskólann. Þetta var sannkallaður úti dagur á eldri deildunum þennan morguninn.

Göngum í skólann er hluti af verkefninu ,,Virkar og öruggar leiðir í skólann", sem nýtur stuðnings "Go for Green" og annarra samstarfsaðila.
Verkefninu er ætlað að hvetja nemendur, foreldra og starfsmenn skóla til að ganga, hjóla, fara á línuskautum eða á annan virkan hátt til og frá skóla. Íslensk börn og fullorðnir sem taka þátt í verkefninu slást þar með í för með mörgum öðrum þjóðum heims, svo sem Áströlum, Brasilíumönnum, Kýpurbúum, Bretum, Írum, Nýsjálendingum, Svisslendingum og Bandaríkjamönnum.

Í október ár hvert eru börn hvött sérstaklega til að nýta sér virkan samgöngumáta, svo sem göngu, til að ferðast til og frá skóla. Vegna aðstæðna hérlendis var ákveið af undirbúningshóp verkefnisins að hvetja skóla til að byrja verkefnið í september og ljúka því á alþjóðlega göngum í skólann deginum í byrjun október. Markmið verkefnisins eru meðal annars að:

- Hvetja til aukinnar hreyfingar með því að auka færni barna til að ganga á öruggan hátt í skólann og fræða þau um ávinning reglulegrar hreyfingar.

- Stuðla að heilbrigðum lífsstíll fyrir alla fjölskylduna, en hreyfing vinnur gegn hjartasjúkdómum, offitu og sykursýki II og stuðlar að streitulosun, betri sjálfsmynd, o.fl.

- Minnka umferð við skóla og draga þar með úr umferðarþunga, mengun og hraðakstri nálægt skólum ásamt betra og hreinna lofti og öruggari og friðsælli götum og hverfi.

- Stuðla að vitundarvakningu um ferðamáta og umhverfismál. Beina sjónum að því hversu ,,gönguvænt“ umhverfið er og hvar úrbóta er þörf. Auka samfélagsvitund.

- Auka vitund um reglur þær er lúta að öryggi á göngu og hjóli.

Hægt er að lesa meira um verkefnið á heimasíðu Göngum í skólann.

(Upplýsingarnar eru fengnar af heimasíðu Göngum í skólann)

© 2016 - 2020 Karellen