Fjarvistir og veikindi

Foreldrar eru beðnir um að tilkynna veikindi eða önnur forföll í gegnum Völu appið eða í aðalnúmer leikskólans

550 2380. Foreldrar eru beðnir um að láta starfsfólk vita hvað hrjáir barnið ef um veikindi er að ræða svo hægt sé að skrá í heilsubók barnsins.

Leikskólinn er fyrir frísk börn og útivera er mikilvægur þáttur af leikskólastarfinu á öllum árstíðum. Veikist barn skal það dvelja heima þar til það er tilbúið að taka þátt í öllu leikskólastarfi jafnt úti sem inni. Ef barn þarf verkjalyf til þess að halda út í daginn á að halda barninu heima. Í undantekningartilvikum getur barnið fengið að vera inni í 1-2 daga eftir veikindi - á það við þegar um langvarandi eða síendurtekin veikindi er að ræða. Ekki er hægt að halda barninu inni til að koma í veg fyrir veikindi.

Slys

Í barnahópi geta alltaf orðið óhöpp eða slys. Ef slíkt kemur fyrir er strax haft samband við forelda og farið með barnið á slysadeild ef þörf er talin á því. Þurfi kennarar eða foreldrar að fara með barn á slysadeild af leikskólanum greiðir leikskólinn fyrir fyrstu heimsókn en síðan foreldrar ef þörf er á frekari meðferð. Öll leikskólabörn eru tryggð á opnunartíma leikskólans og í ferðalögum á vegum skólans.

Lyfjagjafir

Lyf eru ekki gefin í leikskólanum nema læknir meti það svo að tímasetningar lyfjagjafa þurfi að koma inn á leikskólatíma barnsins eins og t.d. sýklalyf sem þarf að gefa 3x á dag. Þar er ekki átt við astma lyf eða önnur lyf sem eru barni lífsnauðsynleg.